काठमाडौं । निर्वाचन आयोगले राष्ट्रियसभामा रिक्त हुन लागेका १९ सांसदको स्थानमा नयाँ सांसद पठाउन गृहकार्य सुरू गरेको छ । आयोगले एक जना राष्ट्रपतिबाट मनोनित हुने बाहेक निर्वाचनबाट पुर्ति हुने १८ रिक्त स्थानका लागि माघ ९ गते निर्वाचनको मिति तय गरिसकेको छ ।
खाली हुन लागेका स्थानमा निर्वाचनबाट पदपुर्ति गर्नका लागि आयोगले आन्तरिक गृहकार्य सुरू गरेको आयोगका प्रवक्ता राजकुमार श्रेष्ठले जानकारी दिए ।
“माघ ९ गते निर्वाचन गर्ने गरी मिति तय भइसकेको छ । आन्तरिक तयारीमा आयोग छ । कार्यतालिका बनाउने, सामाग्री व्यवस्थापनको रुजु गर्ने काम भइरहेको छ,” प्रवक्ता श्रेष्ठले भने ।
राष्ट्रिय सभाबाट आफ्नो दुई वर्षे कार्यकाल सकेर बिदा हुनेमा अर्थमन्त्री डा. युवराज खतिवडा पनि छन् । उनी राष्ट्रपति विद्यादेवी भण्डारीबाट राष्ट्रियसभामा मनोनित सदस्य हुन् ।
राष्ट्रिय सभामा सांसदहरुको गोला प्रथाबाट कार्यकाल तय गरिएको थियो । कार्यकाल सकिएपछि रिक्त हुने राष्ट्रिय सभा सदस्य पदमा नयाँ नियुक्तिका निर्वाचन आयोगले राजनीतिक दलहरुसँग छलफल थालिसकेको छ ।
राष्ट्रिय सभामा ५९ सदस्य छन् । जसमध्ये १९ जना सांसदको कार्यकाल फागुन २० गते सकिँदैछ । १८ जना सांसद निर्वाचनको प्रक्रियाबाट छनिनेछन् भने १ जना राष्ट्रपतिबाट मनोनित हुनेछन् ।
जो राष्ट्रिसभाबाट बिदा हुँदैछन्
दुई वर्षे कार्यकाल सकेर राष्ट्रियसभाबाट विदा हुनेमा सत्तारुढ दल नेकपा र प्रमुख प्रतिपक्षी दल नेपाली कांग्रेसका सांसदहरु धेरै छन् । नेकपाका नौ, कांग्रेसका सात, राष्ट्रिय जनता पार्टीका दुई र समाजवादी पार्टीका एकजना सदस्यको कार्यकाल यहि फागुन २० मा सकिँदैछ ।
सांसदहरु सरिता प्रसाईं, सुरेन्द्रराज पाण्डे, हरिचरण शिवाकोटी, रामप्रित पासवान, बिन्दादेवी आले, वृषेशचन्द्रलाल, बद्रीप्रसाद पाण्डे, बलरामप्रसाद बाँस्कोटा, मीना बुढा, मुक्ताकुमारी यादव, डा. युवराज खतिवडा, युटोल तामाङको कार्यकाल सकिँदैछ ।
त्यस्तै, रमेशप्रसाद यादव, राजकुमार यादव, दुर्गाप्रसाद उपाध्याय, धनकुमारी खतिवडा, कमलाकुमारी ओली, कालीबहादुर मल्ल र खेमराज नेपाली पनि राष्ट्रियसभाबाट बिदा हुँदैछन् ।
जो चार वर्ष राष्ट्रिय सभामा रहनेछन्
राष्ट्रियसभामा अर्को दुई वर्ष कार्यकाल रहेका २० जना सांसद छन् । दुई वर्ष कार्यकाल पूरा गरेका उनीहरु अझै दुई वर्ष राष्ट्रिय सभामा रहनेछन् । सांसदहरु परशुराम मेघी गुरुङ, सुमनराज प्याकुरेल, राधेश्याम अधिकारी, दीनानाथ शर्मा, चन्द्रबहादु खड्का, खगेन्द्रप्रसाद पुरी, शेरबहादुर कुँवर, रामनारायण बिडारी, नैनकला ओझा, शशिकला दाहालको कार्यकाल चार वर्ष छ ।
त्यस्तै, उदया शर्मा पौडेल, शान्तिकुमारी अधिकारी, कोमल वली, कविता बोगटी, तारादेवी भट्ट, खिमकुमार विक, चक्र स्नेही, रामलखन चमार, जीवन बुढा र अगम वान्तवा राई पनि थप दुई वर्ष संसदमा रहनेछन् ।
पुरा कार्यकाल रहने सांसद
गोलाप्रथा एकप्रकारले भाग्य चिठ्ठाजस्तै हो । गोला तान्दा जति पदावधि पर्छ त्यती नै समयावधि राष्ट्रियसभामा रहने व्यवस्था छ । यसरी गोला तान्दा पुरा कार्यकाल अर्थात ६ वर्ष नै सांसद बन्न पाउनेमा राष्ट्रिसभा अध्यक्ष गणेश तिमल्सिनासहित २० सांसद छन् ।
सांसदहरु रमेशजङ्ग रायमाझी, जितेन्द्रनारायण देव, रामबहादुर थापा, गणेशप्रसाद तिमिल्सिना, खिमलाल भट्टराई, भैरवसुन्दर श्रेष्ठ र हरिराम चौधरी, बिना पोखरेल, प्रमिलाकुमारी, दिलकुमारी रावल, दीपा गुरुङ, अनिता देवकोटाको कार्यकाल ६ वर्षकै छ ।
त्यस्तै, सांसद नन्दा चपाई, इन्दु कडरिया, नरपति लोहार, सिंहबहादुर विश्वकर्मा, प्रकाश पन्थ, महेशकुमार महरा, रामचन्द्र राई र विमला राई पौडेल पनि पुरा कार्यकाल राष्ट्रिय सभामा रहने भाग्यमानी हुन् ।