काठमाडौं । नेपाली कांग्रेसकी नेतृ सुजाता कोइरालाले नेपालमा कोही कम्युनिष्ट हुनै नसक्ने बताएकी छन् । गिरिजाप्रसाद कोइराला फाउन्डेसन सिन्धुपाल्चोकले आयोजना गरेको कार्यक्रममा बोल्दै उनले नाम कम्युनिष्ट राखे पनि नेपालमा कोही कम्युनिष्ट हुनै नसक्ने दाबी गरिन् ।
“जुन मुलुकको जे सँस्कृति हो त्यहाँका जनता त्यही अनुसारको हुने हो । नेपाली जनता स्वभावैले प्रजातन्त्रवादी छन् ,” उनले भनिन्, “नाम कम्युनिष्ट राखे पनि नेपालमा कोही कम्युनिष्ट हुनै सक्दैनन् ।” उनले मदन भण्डारीको जनताको बहुदलीय जनवाद पनि प्रजातान्त्रिक विचारधारनै भएको बताइन् ।
त्यस्तै, उनले अहिले देशमा राष्ट्रियता र प्रजातन्त्र कमजोर भएको बताइन् । गिरिजाप्रसाद कोइरालाले देखाएको सहमति, सहकार्य र एकताको बाटो नै राष्ट्रियता र प्रजातन्त्र बलियो बनाउने बाटो भएको उनको भनाइ थियो । कांग्रेस अहिले कमजोर अवस्थामा रहेको भन्दै आन्तरिक एकता मजबुत बनाउनुपर्नेमा उनले जोड दिइन् ।
कार्यक्रममा पूर्वराजदूत जयराज आचार्यले मुलुकको परराष्ट्र नीति गलत बाटोमा गएको बताए । ‘‘अहिले सरकारको परराष्ट्रनीति गलत बाटोमा छ । यसले देशभित्र विपत्ति निम्त्याउँछ,” उनले भने । देशलाई अघि बढाउन अब राजनीतिक दलभित्र युवा नेतृत्व आउनुपर्नेमा उनको जोड थियो ।
कार्यक्रममा डा। उमेश भट्टराईले नेपालको शान्ति प्रक्रियामा गिरिजाप्रसाद कोइरालाले खेलेको भूमिकाबारे चर्चा गरे । उनले अहिले पनि राष्ट्रियता, लोकतन्त्र र संघीयता खतरामा रहेको भन्दै प्रजातन्त्रवादीहररूले सचेत हुने बेला आएको बताए ।
