काठमाडौं । राष्ट्रिय खेलकुद परिषदका सदस्य सचिव रमेश कुमार सिलवालले १३ औं दक्षिण एशियाली खेलकुद (साग) पछि एशियन खेलकुद, ओलम्पिक र विश्वकपसहितको मंहत्वकाक्षी योजनासहित अघि बढ्ने बताएका छन् ।
बिहीबार काठमाडौंमा आयोजित पत्रकार सम्मेलनमा सदस्यसचिव विष्टले १३ औं सागपछि के गर्ने नभइ आगामी दिनमा अझै पदक सङख्या बढाउन र खेलस्तर सुधार्न महत्वाकांक्षी योजनासहित अघि बढ्ने बताएका हुन् ।
उनले भने,“अब १४ औं सागमा केन्द्रित हुनेछौं । ओलम्पिक गेम, एशियन गेम हुँदै विश्वकपसम्म पुग्ने स्तर बनाउनेछौं । दक्षिण एशियाली खेलकुदमा हामी पावर हासउको रुपमा उदायौं । अब एशियन गेम हुँदै विश्वकपसम्म पुग्ने हुनेछ । त्यहीअनुसारको प्रशिक्षण र तयारी गर्छौं ।”
उनले अहिलेको पदक सङ्ख्याको साखलाई जोगाइराख्न अहिलेदेखि नै योजना बनाएर अघि बढ्नुपर्ने बताए । त्यसका लागि राखेपमा आबद्ध १ सय ५६ संघले दिएको योजनाअनुसार खेलाडीको आगामी दिनको कार्य तय हुनेछ ।
उनले भने,“ मैले तीनपटक पत्र काटिसकें । तीनवर्ष अघिको कामको उपलब्धि र अब यो वर्षको उद्देश्य राखेर जवाफ पठाउन भनेको थिएँ । तर, अहिलेसम्म ७० संघले मात्रै जवाफ फर्काए, बाँकी ८६ वटाले अहिलेसम्म कुनै जवाफ दिएका छैनन् । मैले अन्तिम चेतावनी दिएको छु । अब पनि कुनै जवाफ नआए, म विकल्पमा लाग्छु । क्रियाशिल नभएका संघलाई क्रियाशिल बनाउछु । यदि क्रियाशिल नभए नयाँ संघ बनाएर गति दिन्छु । नभए बर्खास्त हुनेछन्।”
नेपालको खेलकुद क्षेत्रले क्रमिक रुपमा सुधार र छलाङ मार्दै गएको बताएका सदस्यसचिब सिलवालले खेललाई उत्पादनशील क्षेत्रको रुपमा अघि बढाउने उल्लेख गरे ।
