काठमाडौं । राजस्व अनुसन्धान विभागले भारतीय नम्बर प्लेटका गाडी नेपालमा ल्याएर नक्कली नम्बर प्लेट राखी बेच्ने र नक्कली बिजक प्रयोग गर्नेविरुद्ध अदालतामा मुद्दा दायर गरेको छ ।

विभागले भारतबाट भन्सार चोरी पैठारी गरी भारतीय नम्बर प्लेटका गाडी नेपालमा ल्याई नक्कली नम्बर प्लेट लगाई बिक्री वितरण गरेको अभियोगमा ६ जनाविरुद्ध काठमाडौं जिल्ला अदालतमा मुद्दा दायर गरेको छ ।

विभागले नुवाकोट विदुर नगरपालिकाका सन्तबहादुर ओझा, सन्तोष राई, रन्जिप श्रेष्ठ, बैतडी पुचौडी भट्ना गाउँपालिका ८ का कृष्णानन्द भट्ट, वीरगञ्ज महानगरपालिका ३ का निजामुद्धिन र तेह्रथुम आठराई गाउँपालिका ४ का अभयराज घिमिरेविरुद्ध भारतबाट भन्सार चोरी पैठारी गरी भारतीय नम्बर प्लेटका गाडी नेपालमा ल्याई नक्कली नम्बर प्लेट लगाई बिक्री वितरण गरी राजस्व चुहावट गरेको भन्दै ३ करोड ३५ लाख बिगोसहित दोम्बरसम्म जरिवाना गरी ३ वर्ष कैद सजाय माग गरेको छ ।

यस्तै विभागले काभ्रेपलान्चोक पोखरीचौरी स्थायी बसोबास भई हाल काठमाडौं महानगरपालिका ३२ बस्ने एस एन्ड एस अफसेट प्रेसका सञ्चालक रामशरण गौतमविरुद्ध पनि अदालतमा मुद्दा दायर गरेको छ ।

विभागले गौतमले राजस्व चुहावट गरेको अभियोगमा २ करोड ७९ लाख बिगो कायम गरी बिगोको दोब्बरसम्म जरिवाना र ३ वर्षसम्म कैद सजायको माग दाबी गरी मुद्दा दर्ता गराएको महानिर्देशक दीर्घराज मैनालीले जानकारी दिए ।