काठमाडौं । महानगरीय प्रहरी कार्यालय रानीपोखरीका प्रमुख प्रहरी नायब महानिरीक्षक (डीआईजी) विश्वराज पोखरेलले प्रहरी अधिकारीलाई दैनिक एकछाक जवानसँगै खाना खान निर्देशन दिएका छन् ।
उनले हप्तामा एकदिन जवान-हवल्दारको ब्यारेकमै सुत्न पनि निर्देशन दिएका हुन् । आइतबार महानगरीय प्रहरी परिसर ललितपुरको निरीक्षण तथा निर्देशन कार्यक्रममा पोखरेलले यस्तो निर्देशन दिएका हुन् ।
प्रहरी अधिकृतले तल्लो तहका प्रहरी कर्मचारीसँगै खाना खाँदा र हप्तामा एकदिन व्यारेकमा सुत्दा सम्बन्ध बलियो हुने पोखरेललको विश्वास छ । पोखरेलले तल्लो तहका प्रहरीको मनोबल बढाउन यस्तो योजना अघि सारेका हुन् ।
यस्तै पोखरेलले गल्ति गर्ने प्रहरी कर्मचारीलाई कारवाहीको दायरामा ल्याउने बताए । नागरिकलाई गर्ने व्यवहारमा नम्रता, शिष्टता र कानुन प्रयोगमा निर्मम बन्न पोखरेलले निर्देशन दिए । पोखरेलले भने, ‘‘कुनै कर्मचारीले व्यक्तिगत स्वार्थ पूरा गर्न लोभ लालचमा परी गलत कार्य गरेको पाइए वा आर्थिक अनियमितता गरेको फेला परेमा कारवाहीको दायरमा ल्याउँछु । उत्कृष्ट कार्य गर्नेलाई पुरस्कृत पनि गर्छु ।’’
राजधानीका प्रहरीले गरेको कार्य वा व्यवहारले समग्र संगठनको प्रतिनिधित्व गर्ने पोखरेल बताउँछन् । नागरिकको शान्ति-सुरक्षाको जिम्मेवारी प्रहरीले लिएकाले कार्यक्षेत्रमा नागरिकसँग गर्ने व्यवहारले प्रहरी बेला-बेला आलोचना हुँदै आएको स्मरण गराउँदै आम नागरिकसँगको व्यवहारमा शिष्टता र नम्रता प्रर्दशन गर्न उनले आग्रह गरे ।