काठमाडौं । महानगरीय प्रहरी प्रभाग नागढुङ्गाले भन्सार छलेर काठमाडौं भित्र्याउँदै गरेको अवस्थामा ३५ लाख मूल्य बराबरका मोबाइल सेट बरामद गरेको छ ।
प्रहरी निरीक्षक हेमन्त थापाको नेतृत्वमा खटिएको टोलीले नागढुंगा चेक प्वाइन्टमा बस जाँच गर्ने क्रममा उक्त परिमाणका मोबाइल बरामद गरेको हो ।
प्रहरी वृत्त थानकोटका डीएसपी घनश्याम श्रेष्ठले वीरगन्जबाट काठमाडौं आउँदै गरेको ना ६ ख १५३४ नम्बरको बसमा जाँच गर्ने क्रममा भन्सार छलेका मोवाइल बरामद भएको बताए । बसको सिटमुनि लुकाएको अवस्थामा विभिन्न कम्पनीका ७५ थान मोवाइल बरामद गरिएको हो ।
यस्तै नेपालगन्जबाट काठमाडौं आउँदै गरेको ना ७ ख ७३९५ नम्बरको यात्रु बाहक बसमा जाँच गर्ने भन्सार छलेका ३२ वटा मोबाइल सेट बरामद गरिएको डीएसपी श्रेष्ठले बताए । बरामद गरिएका मोवाइल आवश्यक अनुसन्धान तथा कारबाहीको त्रिभुवन अन्तराष्ट्रिय विमानस्थल, भन्सार कार्यालय सानो गौचरण पठाइएको प्रहरीले जनाएको छ ।