काठमाडौं । नेपाली कांग्रेसमा चुलिएको पछिल्लो विवाद समाधानका लागि बुधबार (आज) शीर्ष नेताहरुबीच छलफल हुँदैछ ।
सभापति शेरबहादुर देउवा र वरिष्ठ नेता रामचन्द्र पौडेलसहितका नेताहरुबीच छलफल हुने भएको छ ।
सभापति देउवाले वरिष्ठ नेता पौडेललाई छलफलका लागि आप्mनै निवास बूढानीलकण्ठ बोलाएका छन् । सभापति देउवाका सहयोगी भानु देउवाले दिउँसो ३ बजेका लागि तय गरिएको बैठकमा पार्टीभित्रको पछिल्लो समस्या सामाधानका लागि छलफल हुने जानकारी दिए ।
यसअघि गत पुस २७ गते बूढानीलकण्ठमै सभापति देउवा, वरिष्ठ नेता पौडेल र पूर्वमहामन्त्री कृष्णप्रसाद सिटौलाबीच छलफल भएको थियो । वरिष्ठ नेता पौडेल उपचारका लागि भारतको नयाँदिल्ली जानुपूर्व भएको उक्त छलफलमा दुबै पक्षले गठन गरेका कार्यदलले अनौपचारिक छलफल गरी समस्या समाधानका लागि पहल गर्नेबारे सहमति जुटेको थियो ।
यसबीचमा उपसभापति विमलेन्द्र निधि, पौडेल समूहले वार्ताका लागि गठन गरेको कार्यदलका सदस्य प्रकाशमान सिंह र तेस्रो धारको नेतृत्व गर्दै आएका नेता सिटौलाबीच सानेपामा पटकपटक छलफल भइसकेको छ ।
पछिल्लो समय गत आइतबार भएको अनौपचारिक छलफलमा नेतात्रयबीच तत्काल सहमति निर्माण गरी अघि बढ्ने बिषयमा सहमति जुटेको थियो ।
स्रोतका अनुसार सभापति देउवा १४ औं महाधिवेशनको पूर्वनिर्धारित मिति यथावत राखेर तल्लो तहका संरचनाको अधिवेशन मिति सच्याउन सकारात्मक देखिएका छन् । यस्तै इतर समूहको बहिष्कारका बीच बसेको केन्द्रीय कार्यसमिति बैठकले महाधिवेशन प्रयोजनका लागि निलम्बन गरेका विधानका धाराहरु फुकुवा हुने पनि सम्भावना देखिएको छ ।
