सुर्खेत । राष्ट्रियसभा निर्वाचनका लागि स्थानीय तहका प्रमुख-उपप्रमुख प्रदेश राजधानी सुर्खेत आउने क्रम सुरु भइसकेको छ ।
निर्वाचन आयोगले कर्णाली प्रदेशको मतदानस्थल वीरेन्द्रनगरस्थित जिल्ला निर्वाचन कार्यालयमा तोकेपछि ७९ वटै स्थानीय तहका प्रमुख-उपप्रमुख आउने क्रम सुरु भएको छ । कर्णालीका कतिपय जिल्लाबाट मंगलबारै प्रमुख-उपप्रमुख वीरेन्द्रनगर आइसकेका छन् ।
कर्णालीबाट राष्ट्रियसभाका लागि रिक्त महिला १ र अन्य समूहको १ गरी दुई पदका लागि भोलि निर्वाचन हुँदै छ । सत्तारुढ नेपाल कम्युनिस्ट पार्टी (नेकपा) ले मायाप्रसाद शर्मा र सुमित्रा बीसी तथा नेपाली कांग्रेसले डिल्लीराज पाठक र गणेशकुमारी बस्नेतलाई उम्मेदवार बनाएका छन् ।
नेकपाले आज प्रदेश पार्टी कार्यालयमा भेला बोलाएको छ । प्रदेश कमिटी अध्यक्ष गोरखबहादुर बोगटीले प्रदेश इन्चार्ज, सहइन्चार्ज, १० वटै जिल्लाका जनप्रतिनिधि, जिल्ला इन्चार्ज, सचिवलाई भेलामा बोलाइएको बताए । “मतदाता र उम्मेदवारबीच परिचयात्मक अन्तर्क्रियाका लागि भेला बोलाइएको हो,” उनले भने, “अधिकांश मतदाता प्रतिनिधि आइसक्नुभएको छ, केही आजै आइपुग्नुहुन्छ ।” कांग्रेसले भने मतदातासँग समन्वय गर्ने जिम्मेवारी सम्बन्धित जिल्लाका सभापतिलाई दिएको छ ।
प्रदेशसभा सदस्य र स्थानीय तहका प्रमुख-उपप्रमुख मतदाता मण्डल हुन् । कर्णालीमा ४० प्रदेशसभा सदस्य तथा १५८ स्थानीय तहका प्रमुख-उपप्रमुख छन् । नेकपाले ४० मध्ये ३३ प्रदेशसभा सदस्य र १५८ मध्ये ५३ स्थानीय तह जितेको छ । मतभार निकै फरक अन्तर भएकाले कर्णालीमा पनि नेकपाका उम्मेदवार मतदाता, पार्टी नेता तथा कार्यकर्तासँग भेटघाटमा व्यस्त छन् ।
यहाँ नेकपाको कुल ३ हजार ५६४ तथा कांग्रेसको ९९० मतभार छ । राप्रपाको ६६ र स्वतन्त्रको १०८ मतभार रहेको निर्वाचन अधिकृतको कार्यालयले जनाएको छ ।
