धनगढी । सुदूरपश्चिममा ४५ जना कोरोना संक्रमित थपिएका छन् । सेती प्रादेशिक अस्पतालले पछिल्लो चौबीस घण्टामा १२ महिला र ३३ पुरुष गरी ४५ संक्रमित थपिएको पुष्टि गरेको हो । 

अस्पतालका मेडिकल सुपरिडेन्टेन्ट डा. हेमराज पाण्डेले कञ्चनपुरको पुनर्वास नगरपालिकाका २८, कैलालीको गोदावरी नगरपालिकाका नौ, टीकापुर नगरपालिकाका एक, धनगढी उपमहानगरपालिका ८ का दुई र डडेल्धुराको परशुराम नगरपालिकाका पाँचजनामा कोरोना संक्रमण देखिएको जानकारी दिए । 

डा. पाण्डेले पछिल्लो चौबीस घण्टामा गरिएको एक सय ३७ जनाको परीक्षण गर्दा उनीहरूमा कोरोना संक्रमण देखिएको बताए । सुदूरपश्चिममा हालसम्म १० हजार नौ सय ५२ जनाको धनगढीस्थित प्रयोगशालामा पीसीआर विधिबाट कोरोना परीक्षण भइसकेको छ ।