काठमाडौं । वैशाख तेस्रो साताबाट राजधानीमा सुरु हुने केएनपी राष्ट्रिय महिला भलिबल प्रतियोगितालाई शिवम् सिमेन्टले सहप्रायोजन गर्ने भएको छ । आयोजक शेरबहादुर खड्का स्मृति प्रतिष्ठान र शिवम् सिमेन्ट लिमिटेडबीच मंगलबार सहप्रायोजन सम्झौतामा हस्ताक्षर भएको छ  । 

त्रिपुरेश्वरस्थित राखेप कभर्डहलमा वैशाख २१ देखि २५ सम्म चल्ने प्रतियोगिताको लागि आयोजक प्रतिष्ठान र शिवम्बीच एक वर्षे सम्झौता भएको हो । प्रतिष्ठानकी संरक्षक गमली खड्का र शिवम्का प्रोजेक्ट हेड निखिल अग्रवालले सम्झौतापत्रमा हस्ताक्षर गरे ।

सम्झौतासँगै शिवम्ले प्रतियोगिताको लागि आयोजकलाई ५ लाख उपलब्ध गराउने छ । शिवम्ले ३ लाख नगद प्रदान गर्नेछ भने २ लाख बराबरको मञ्च व्यवस्थापन र फुटकर खर्चको लागि नगद उपलब्ध गराउने प्रतिष्ठानका अध्यक्ष रञ्जन खड्काले जानकारी गराए । सम्झौतासँगै शिवम्ले आयोजकलाई ३ लाखको चेक हस्तान्तरण गरेको थियो । यो प्रतियोगिताको लागि शिवम्ले दोस्रो पटक प्रायोजन गरेको हो । प्रतियोगिताको लागि गत वर्ष पनि शिवम्ले ३ लाख बराबरको सहयोग गरेको थियो ।

प्रतियोगितामा तीन विभागीय टोलीसहित शिवम् न्यु डायमण्ड एकेडेमी, पश्चिमाञ्चल भलिबल टोली र जावलाखेल भलिबल प्रशिक्षण केन्द्रसहित ६ टोलीको सहभागिता रहनेछ । केएनपी जापान प्रालिको मुख्य प्रायोजनमा रहने प्रतियोगिताको विजेताले १ लाख ५० हजार, उपविजेताले १ लाख र तेस्रो हुने टोलीले ५० हजार पुरस्कार पाउनेछन् ।

प्रतियोगिताको उत्कृष्ट खेलाडीले १० हजार तथा व्यक्तिगत विधामा उत्कृष्ट हुने समान ५ – ५ हजार पुरस्कार पाउनेछन् । त्यस्तै आयोजकको रोजाईमा एक खेलाडीलाई केएनपी शेरबहादुर खड्का स्मृति स्पेशल अवार्डसहित नगद १० हजारले सम्मानित गरिने आयोजकले जनाएको छ ।