काठमाडौं । प्रतिनिधिसभाले पारमाणविक विज्ञान तथा प्रविधिसम्बन्धी अनुसन्धान, विकास र तालीमका लागि सम्पन्न क्षेत्रीय सहयोग सम्झौता, २०१७ लाई स्वीकृत गरेको छ । 

प्रतिनिधिसभाको मंगलबारको बैठकमा ‘शिक्षा, विज्ञान तथा प्रविधिमन्त्री गिरिराजमणि पोखरेलले ‘पारमाणविक विज्ञान तथा प्रविधिसम्बन्धी अनुसन्धान, विकास र तालीमका लागि सम्पन्न क्षेत्रीय सहयोग सम्झौता, २०१७ माथि छलफल गरियोस्’ भनी यसअघि राखेको प्रस्तावलाई सभाले सहमति जनाएको थियो । 

उक्त प्रस्तावमाथिको छलफलमा भाग लिँदै सांसद प्रेम सुवालले सम्झौता सर्सर्ती हेर्दा मुलुकको पक्षमा नरहेको भए पनि अनुमोदन नै गर्ने भए थप छलफलको आवश्यकता रहेको बताए ।  

सांसद नवराज सिलवाल र सञ्जयकुमार गौतमले शान्तिपूर्ण पारमाणिक विज्ञानको विषय भएकाले विज्ञान र प्रविधि क्षेत्रमा विकासका अनुभव आदानप्रदान गर्न तथा स्वास्थ्य, पानी, वातावरण र कृषिको प्रवद्र्धन गर्ने सन्दर्भमा सकारात्मक लाभ लिन सकिन्छ भने । 

उक्त सहयोग सम्झौतामाथि भएको छफलमा भाग लिँदै सांसद शेरबहादुर तामाङले स्वास्थ्य क्षेत्रमा रेडियोलोजीको प्रयोगबाहेक अरू क्षेत्रमा लाभ लिने ठाउँ नरहेको पक्षलाई हेक्का राख्न सुझाव दिए ।  

मन्त्री पोखरेलले सांसदले उठाएको प्रश्नको जवाफ दिँदै जोखिम र नकारात्मक पक्षलाई रोक्न र बुझ्न पनि यसमा सामेल हुन सम्झौतालाई समर्थन गर्नुपर्ने आवश्यकता रहेको बताए । उनले भने, “समृद्ध राष्ट्र र सुखी नेपालको अभियानलाई साकार तुल्याउन संसारमा विकसित भएका विज्ञान र प्रविधिलाई हामीले आत्मसात् गर्नैपर्छ, त्यसका लागि साझेदारीमा सामेल हुनुपर्दछ ।” अरूको स्वार्थभन्दा आफ्नो हितलाई ध्यानमा राखेर सकारात्मक पक्षलाई मात्र ग्रहण गर्नेतर्फ सोच्नुपर्छ भन्दै अनुमोदन गर्न आग्रह गरे ।  

प्रतिनिधिसभाको अर्को बैठक असोज ४ गते बिहीबार बिहान ११ बजे बस्नेछ । रासस