बीबीसी । अमेरिका र अष्ट्रेलियामा गरिएको एक अध्ययनले नियमित रुपमा एसप्रिन नामक औषधीको सेवन वृद्धवृद्धाका लागि स्वास्थ्य अनुकुल नहुने देखाएको छ । अधिकांश चिकित्सकहरुले हृदयघातपछि बिरामीलाई एसप्रिन नामक औषधी सेवनको सल्लाह दिन्छन् । जसले रगतलाई पातलो बनाएर अर्को पटक हृदयघात हुनबाट जोगाउदछ ।
हृदयघात पछि एसप्रिन नामक औषधीको सेवनबाट बिरामीलाई लाभ पुग्ने गरेको चिकित्सा शिक्षाले प्रमाणितसमेत गरिसकेको छ । तर ७० वर्ष पार गरेका वृद्धवृद्धाहरुका लागि भने यो स्वास्थय अनुकुल हुँदैन । अध्ययनका क्रममा वृद्धवृद्धाहरुलाई समावेश गरिएको थियो । जसमा अमेरिका र अस्ट्रेलियाका १९ हजार ११४ जना थिए । अध्ययनका क्रममा समावेश गरिएका वृद्धवृद्धाहरुलाई एक पटक पनि हृदयघात भएको थिएन ।
जसमध्ये आधालाई पाँच वर्षसम्म नियमित रुपमा एसप्रिन सेवन गर्न दिइएको थियो । न्यू इंग्ल्याण्ड जर्नल अफ मेडिसिनमा प्रकाशित तीन वटा प्रतिवेदनले एसप्रिन खान दिइएपनि उनीहरुमा न त हृदयघात हुने सम्भालवना नै कम भयो न त अन्य कुनै फाइदा । अपेक्षा गरिएको विपरित उनीहरुको पेटमा रक्तस्राव हुन सुरु भयो ।
अक्सफोर्ड युनिभर्सिटीका प्रोफेसर पीटर राथवेलले ७० वर्षसम्म हृदयघात नभएका मानिसलाई एसप्रिनको नियमित सेवनले धेरै कम मात्रामा फाइदा पुग्ने बताएका छन् । उक्त अध्ययन हृदयघातका विरामीको हकमा भने लागु नहुने र उनीहरुले चिकित्सकको सल्लाह अनुसार नै औषधी सेवन गर्नुपर्ने अध्ययनमा उल्लेख छ ।
बीबीसीबाट