काठमाडौं । निजी क्षेत्रको आन्तरिक वायुसेवा कम्पनी यती एयरलाइन्सले ७२ सिट क्षमतायुक्त अर्को ‘एटिआर७२–५००’ सिरिजको जहाज काठमाडौं ल्याएको छ । फ्रान्सेली जहाज निर्माता कम्पनी एटिआरमा निर्मित ७२ सिटे यस्तो जहाज यतीसँग अब तीनथान भएका छन् ।
हाल यतीले बेलायतमा निर्मित ३० सिट क्षमतायुक्त ‘जेटस्ट्रिम–४१’ सिरिजका पाँचथान जहाज सञ्चालन गरिरहेको छ । यतीका क्याप्टेन प्रमोद पौडेल, रमोदकुँवर श्रेष्ठ र सुरेन्द्र कुँवरको टोलीले जहाज मंगलबार काठमाडौं ल्याएको हो । नेपाल नागरिक उड्डयन प्राधिकरणले यतीको यो जहाजलाई ‘९एन–एएलएन’ दर्ता नम्बर दिएको छ ।
नयाँ एटिआर जहाज हाल नेपालमा भएका एटिआरमध्ये सबैभन्दा कम उमेरको भएको यतीले दाबी गरेको छ । नयाँ जहाजबाट भद्रपुर र पोखरा उडान थप गर्ने कम्पनीले जनाएको छ । यसबाट २० लाख पर्यटक ल्याउने सरकारको अभियान ‘नेपाल भ्रमण वर्ष २०२०’ मा उल्लेख्य सहयोग पुग्ने यतीले जनाएको छ ।
हाल यतीले ५ थान जेटस्ट्रिम–४१ जहाजमार्फत त्रिभुवन अन्तर्राष्ट्रिय विमानस्थलबाट माउन्टेन फ्लाइट, पोखरा, नेपालगन्ज, भैरहवा, भद्रपुर, जनकपुर, विराटनगर, भरतपुर र तुम्लिङटार गन्तव्यका लागि दैनिक २५ देखि ३० उडान गर्दै आएको छ । कम्पनीले ती सबै सेक्टरका उडानमा अपांगता भएकालाई ५० प्रतिशत, ज्येष्ठ नागरिकलाई २५, बालबालिकालाई ३३.३३ र शिशुलाई ९० प्रतिशत छुट दिँदै आएको छ ।
पछिल्लो तथ्यांकअनुसार सन् २०१६ मा यतीले ४ लाखभन्दा बढी यात्रुलाई विभिन्न गन्तव्य पु¥याएको थियो । हाल आन्तरिक उड्डयन बजारमा यतीको हिस्सा ३५ देखि ४० प्रतिशत रहेको कम्पनीको भनाइ छ ।