काठमाडौं । प्रधानमन्त्री केपी शर्मा ओलीले स्वदेशी निर्माण व्यवसायीलाई प्रोत्साहन गर्न सरकार सकारात्मक रहेको बताएका छन् । नेपाल निर्माण व्यवसायी महासंघको २० औं साधारणसभाको उद्घाटन गर्दै प्रधानमन्त्री ओलीले आज यस्तो बताएका हुन् ।
प्रधानमन्त्री ओलीले स्वदेशी निर्माण व्यवसायीहरुको स्तर र क्षमता वृद्धि गर्नमा सरकार सकारात्मक रहेको बताए ।
देश विकासको जिम्मा निर्माण क्षेत्रकै काँधमा रहेको उल्लेख गर्दै प्रधानमन्त्री ओलीले यो पेशालाई मर्यादित बनाउन आग्रह गरे । “तपाईंहरुको काँधमा देश निर्माणको ठुलो जिम्मेवारी छ । तर तपाईंहरु भित्र रहेका विसंगतिहरुको अन्त्य हुनु पनि जरुरी छ,” प्रधानमन्त्री ओलीले भने, “एउटा काम गर्न सक्ने क्षमता भएको व्यवसायीले २० वटा काम जिम्मा लिने । अनि एक बर्षमा सकिने कामका लागि २०बर्ष पर्खनु पर्ने ? यस्तो थिती अब चल्दैन ।”