काठमाडौं । ३३ औं किङ्स कप सेपाकताक्रो च्याम्पियनसिपमा सहभागी हुन थाइल्यान्ड जाने नेपाली सेपाकताक्रो टोलीको बिदाइ गरिएको छ । शुक्रबार थाइल्यान्ड जाने टोलीको बिदाइ राष्ट्रिय खेलकुद परिषद्का सदस्य सचिव केशवकुमार विष्टले गरेका हुन् । सेप्टेम्बर २३ देखि ३० तारिखसम्म हुने प्रतियोगितामा नेपाली पुरुष÷महिला खेलाडी टोलीले रेगु, डबल्स र क्वाड स्पर्धामा सहभागिता जनाउनेछन् ।

थाइल्यान्ड जाने पुरुषतर्फ खेलाडीमा रुपेश सुनार (कप्तान), रोशन तामाङ, सुजन डंगोल, सन्जिव धिमाल, रविन भट्टराई तथा विजय महतो रहेका छन् । त्यस्तै, महिलातर्फ सोममाया थापा मगर (कप्तान), चन्द्रा चौधरी, भूमि थिङ लामा, स्वस्तिका श्रेष्ठ र सुमित्रा डंगोल छन् ।  टिम व्यवस्थापकमा नेपाल सेपाकताक्रो संघका अध्यक्ष नेत्रबहादुर गुरुङ र गंगाबहादुर गुरुङ छन् ।

उक्त प्रतियोगितामा ३५ राष्ट्रको सहभागि हुने अध्यक्ष गुरुङ बताए । निर्णायकको भूमिकामा अर्जुनबहादुर ठकुल्ला र सलिना थापा पनि टोलीसँगै थाइल्यान्ड जाने भएका हुन् । किङ्स कपमा नेपालले २९ औं संस्करणदेखि भाग लिन सुरु गरेको थियो । त्यसएता ३१ ऋौं संस्करण बाहेक सबैमा सहभागिता जनाएको थियो । २०७२ को भूकम्पका कारण नेपालले ३१ औं संस्करणमा सहभागिता जनाएन ।

सहभागी ३ संस्करणमा हालसम्म नेपालले ४ कांस्य जितेको छ । २९ औं संस्करणमा नेपालले पुरुष रेगु, ३० औंमा पुरुष रेगु र डबल्स तथा ३२ औंमा महिला रेगुमा कांस्य पदक जितेको थियो ।