एजेन्सी । इ–सिगरेट अर्थात इलेक्ट्रोनिक सिगरेट, एउटा इ–जुस नामक तरल पदार्थ तातो भएपछि काम गर्छ जसमा विभिन्न फ्लेबरसहित प्रोपिलिन, ग्लाइकोल, ग्लिसिरिन र अधिकांशमा निकोटिन पनि राखिएको छ । तर निकोटिन जस्तो हानिकारक पदार्थ भएपनि पछिल्लो समय युवाहरु यसप्रति अत्यन्तै आकर्षित भइरहेको पाइएको छ ।
चुरोट सेवनको दर त घटिरहेको छ तर अर्कोतिर १२ वर्षकालाई समेत इ–सिगरेटको लत लागिरहेको पाइएपछि यस विषयमा स्वास्थ्यविद्हरुले गम्भीर चिन्ता व्यक्त गरेको सीएनएनले जनाएको छ ।
हेर्दा सामान्य युएसबी र पेनड्राइभ जस्तो देखिने यो वस्तुलाई लुकाउन पनि अत्यन्तै सजिलो हुने गर्दा धेरैले बिना डर र बिना अनुमति सजिलै यसको प्रयोग गर्ने गरेकाले नै यसको लोकप्रियता बढ्दै गइरहेको बताइएको हो । तर हालै गरिएका विभिन्न अनुसन्धानपछि भने यसले प्राचीन समयको चुरोट जस्तैगरी स्वास्थ्यमा ठूलो असर पुर्याउन सक्ने पत्ता लागेको छ । निकोटिनको लत लाग्ने समस्याकै कारण यसले शरीरलाई गम्भीर क्षति गर्ने गरेको बताइएको छ । पेडियाट्रिक्सको जोर्नालमा पेश गरिएको अध्ययन अनुसार इ–सिगरेट मार्फत धुँवा लिएका १६ वर्षे युवाको पिशाबमा क्यान्सर पैदा गर्न सक्ने पाँच हानिकारक तत्व भेटिएको थियो ।
यसबारे जर्नेल सर्जन, डाक्टर जेरोमी एडम्स भन्छन्, “कुनै युवाले पनि कहिल्यै इ–सिगरेटको प्रयोग गर्नुहुँदैन । हामीले यसभित्र हुने केमिकलका खतराबारे सबैलाई स्पष्ट जानकारी दिनुपर्छ । यस्ता तत्व भित्र लिँदा फोक्सोमा ठूलो क्षति पुग्ने गर्दछ भने अरु गम्भीर समस्या निम्त्याउने खतरा पनि रहेको छ ।”
यसैकारणले अमेरिकी खाद्य एवम् औषधि विभागले मंगलबार मात्र यसको नोक्सानदायक पक्षबारे प्रचार गर्न ठूलो शैक्षिक अभियान सुरु गर्ने घोषणा गरेको छ । अमेरिकामा मात्र १ करोड भन्दा बढी युवाहरु यसको लतमा परिसकेको हुँदा ठूलो जखिममा रहेकाले युट्युब, फेसबुक जस्ता अत्याधिक प्रयोग हुने सामाजिक संजालहरुमा यसका नकारात्मक असरबारे प्रचार गरिने बताइएको छ ।
यसका साथै अमेरिकाका १० हजार स्कुलका शौचालयमा पनि यस विरुद्ध प्रभावकारी पोस्टरहरु टाँसिने बताइएको हो । चुरोट निपिउने भएपनि ८० प्रतिशत युवाहरुले इ–सिगरेटको सेवनलाई भने सामान्य मान्ने प्रवृत्ति बढ्दै गइरहेको छ । त्यसैगरी अमेरिकी खाद्य विभागले यसका उत्पादकहरुलाई पनि युवाको हात पर्न नदिन चेतावनी दिइसकेको छ । उनीहरुले यसलाई जथाभावि विक्री गरेको फेला पारिएमा कडा कारबाहीको सामना गर्नुपर्ने बताइएको हो ।