काठमाडौं । साताको चौथो दिन नेप्से परिसूचक ऋणात्मक देखिएको छ । साताको पहिलो दिनदेखि नै कारोबार रकम उच्च रहँदै सुधार देखिएको सेयर बजारमा बुधबार भने कारोबार रकम उच्च भए पनि घटेको हो ।
नेप्सेमा तीन दिनपछि गिरावट आउने क्रममा सेयर बजार बुधबार तीव्र उतारचढावपछि २ दशमलव ३१ अंकले घटेर १ हजार २ सय ७७ दशमलव ७४ अंकमा अडिएको हो ।
नेप्से घटेपनि यसदिन उच्च कारोबार हुने क्रमले निरन्तरता पायो । मंगलबार १ अर्ब १२ करोड रुपैयाँको कारोबार भएको सेयर बजारमा यसदिन ९१ करोड ४६ लाख ५६ हजार ८ सय ८४ रुपैयाँको सेयर किनबेच भयो । सोक्रममा बजारमा १७१ कम्पनीका ४५ लाख ९१ हजार ४८ कित्ता सेयर किनबेच भए ।
अल्पकालिन लगानीकर्ताले नाफा बुक गर्न खोज्दा परिसूचक घटेको जानकारहरुले बताएका छन् । छोटा समयमा नाफा कमाएका लगानीकर्ता सेयर बिक्री गर्न हतार गरेकाले केहीदिन उच्च अंकले बढेको बजारमा करेक्सन आएको उनीहरुको दावी छ ।
नेप्से घट्दा यसदिन कारोबारमा आएका जीवन बीमा र अन्यबाहेक सबै उपसूचकमा गिरावट आए । तीमध्ये निर्जीवन बीमा समूह सर्वाधिक २४.२७ अंकले ओरालो लाग्यो । बुधबार सबैभन्दा बढी कुमारी बैंकको ६ करोड २७ लाख रुपैयाँको सेयर किनबेच भयो ।